Ticker

6/recent/ticker-posts

Advertisement- Leader Board

ஐவர்மெக்டின் கோவிட் நோயில் இருந்து காக்குமா? அம்பலமான விடயங்கள்..


ஐவர்மெக்டின் கோவிடுக்கான "அற்புத" மருந்து என்று தடுப்பூசி எதிர்ப்பாளர்களால் கொண்டாடப்படுகிறது. சில நாடுகளில் சுகாதார அதிகாரிகளால் பரிந்துரைக்கப்படுகிறது. ஆனால் இந்த மருத்தைப் பரிந்துரைப்பவர்கள் மேற்கோள் காட்டும் பல ஆய்வுகளில் கடுமையான பிழைகள் இருப்பதை பிபிசி அம்பலப்படுத்துகிறது.

சில ஆண்டுகளாக மனிதர்களுக்கும் விலங்குகளுக்கும் சிகிச்சையளிக்க ஐவர்மெக்டின் ஒரு முக்கியமான ஒட்டுண்ணி எதிர்ப்பு மருந்தாகப் பயன்பட்டு வருகிறது.

ஆனால் பெருந்தொற்றுக் காலத்தில், இதன் ஆதரவாளர்கள் சிலர், இதை கோவிட்டுக்கு எதிராகவும் அதனால் ஏற்படும் மரணங்களைத் தடுக்கவும் பயன்படுத்தலாம் என்று கருத்து தெரிவித்தனர்.

அமெரிக்கா, இங்கிலாந்து மற்றும் ஐரோப்பிய ஒன்றியத்தில் உள்ள சுகாதார அதிகாரிகள் கோவிட்டுக்கு எதிராக இந்த மருந்தைப் பயன்படுத்த போதுமான ஆதாரங்கள் இல்லை என்று கண்டறிந்துள்ளனர், ஆனால் ஆயிரக்கணக்கான ஆதரவாளர்கள், அவர்களில் பலர் தடுப்பூசி எதிர்ப்பாளர்கள், அதை கோவிட் சிகிச்சையில் பயன்படுத்தவேண்டும் என்று தீவிரமாக பிரச்சாரம் செய்து வருகின்றனர்.

சமூக ஊடகக் குழுக்களின் உறுப்பினர்கள் இந்த மருந்துகளைப் பயன்படுத்துவதற்கான குறிப்புகளைப் பரிமாறிக்கொள்கிறார்கள். விலங்குகளுக்குப் பயன்படுத்தப்படும் மாதிரிகளைக் கூட இவர்கள் பரிந்துரைக்கிறார்கள்.

ஐவர்மெக்டினைச் சுற்றியுள்ள பரபரப்பு - அதன் ஆராய்ச்சியின் மீதான வலுவான நம்பிக்கை இவை, உலகெங்கிலும் உள்ள ஏராளமான மக்களை அதைப் பயன்படுத்தத் தூண்டின. இதனை பரிந்துரைப்பவர்கள் பல அறிவியல் ஆய்வுகளை சுட்டிக்காட்டி, இவை பெரும்பாலும் புறக்கணிக்கப்படுவதாகவும் மறைக்கப்படுவதாகவும் கூறுகின்றனர். ஆனால் ஒரு சுயாதீன விஞ்ஞானிகள் குழுவின் மதிப்பாய்வு அந்த ஆராய்ச்சிகள் குறித்த கடுமையான சந்தேகங்களை எழுப்பியுள்ளது.

கோவிட் நோய் மீதான இந்த மருந்தின் தாக்கம் குறித்த 26 முக்கிய சோதனைகளில் மூன்றில் ஒரு பங்குக்கும் அதிகமானவை பிழையானவை அல்லது மோசடியானவை என்றும் மீதமுள்ளவையும் இந்த மருந்தின் செயல்திறனுக்கான உறுதியான ஆதாரங்களைக் காட்டவில்லை என்றும் பி பி சி வெளிப்படுத்துகிறது.

ஆய்வையே புறக்கணிக்கக்கூடிய அளவிலான பிழைகளில்லாத "ஒரே ஒரு மருத்துவ சோதனை" கூட ஐவர்மெக்டின், கோவிட் இறப்புகளைத் தடுத்ததாகக் காட்டவில்லை என்கிறார் டாக்டர் கைல் ஷெல்ட்ரிக், இந்த ஆராய்ச்சிகளை பரிசீலனை செய்த குழுவில் இடம் பெற்றவர்களில் இவரும் ஒருவர்.

இதில் உள்ள முக்கிய பிழைகள்:

  • ஒரே நோயாளியின் தரவு பல முறை பயன்படுத்தப்பட்டுள்ளது.
  • சோதனை குழுக்களுக்கு நோயாளிகளைத் தேர்ந்தெடுப்பதில் பிழை.
  • இயற்கையாக நிகழ வாய்ப்பில்லாத எண்கள்.
  • தவறாகக் கணக்கிடப்பட்ட சதவிகிதம்
  • உள்ளூர் சுகாதார அமைப்புகளுக்கு ஆய்வுகள் பற்றித் தெரியாது.

குழுவில் உள்ள விஞ்ஞானிகளான, டாக்டர் கிடியோன் மேயரோவிட்ஸ் -காட்ஸ், டாக்டர் ஜேம்ஸ் ஹீதர்ஸ், டாக்டர் நிக் பிரவுன் மற்றும் டாக்டர் ஷெல்ட்ரிக் ஆகியோர் போலி அறிவியலை அம்பலப்படுத்துவதில் பங்காற்றியுள்ளனர்.

பெருந்தொற்றுக் காலத்தில், அவர்கள் முறைசாரா மற்றும் தன்னார்வ அடிப்படையில் தொலைதூரத்தில் இருந்து ஒன்றாகப் பணியாற்றுகிறார்கள்.

பயோமெடிக்கல் மாணவர் ஜாக் லாரன்ஸ் எகிப்திலிருந்து வெளியான ஒரு முக்கிய ஆய்வில் உள்ள சிக்கல்களைக் கண்டறிந்த பிறகு இவர்கள் ஐவர்மெக்டின் ஆய்வுகளை ஆழமாக பரிசீலனை செய்யும் ஒரு குழுவை உருவாக்கினர். சோதனை தொடங்குவதற்கு முன்பே இறந்துபோன நோயாளிகள் இந்த ஆய்வில் சேர்க்கப்பட்டிருந்தது முக்கிய பிரச்சனை. இப்போது அந்த ஆய்வை வெளியிட்ட சஞ்சிகை அதை திரும்பப் பெற்றுள்ளது.

சுயாதீன விஞ்ஞானிகள் குழு ஐவர்மெக்டின் மற்றும் கோவிட் மீதான ஒவ்வொரு ரேண்டம் கட்டுப்பாட்டுச் சோதனையையும் (RCT) மருந்து ஊக்குவிப்பாளர்களால் வழக்கமாக மேற்கோள் காட்டப்பட்ட முக்கிய ஆய்வுகள் உட்பட அனைத்துக் கோட்பாடுகளின்படியும் உயர்தர ஆய்வு செய்தது.

RCT முறை சோதனைகளில், சோதனை செய்யப்படும் மருந்து அல்லது மருந்துப்போலி - ஆகியவற்றைப் பெறுவதற்கு பரவலான முறையில் தேர்ந்தெடுக்கப்பட்டவர்கள் இருப்பர்.

இந்தக் குழு குறிப்பாக ஆறு முக்கிய கண்காணிப்பு சோதனைகளை பரிசீலித்தது. இந்த வகை சோதனை எப்படியும் மருந்து உட்கொள்பவர்களுக்கு என்ன நடக்கிறது என்பதைப் பார்க்கிறது.

பரிசீலனை செய்யப்பட்ட 26 ஆய்வுகளில், ஐந்தில், தரவு போலியானதாக இருக்கலாம் என்பதற்கான ஆதாரங்கள் இருந்தன - உதாரணமாக அவற்றில் கிட்டத்தட்ட சாத்தியமற்ற எண்கள் அல்லது ஒரே மாதிரியான நோயாளிகளின் வரிசைகள் நகலெடுக்கப்பட்டு ஒட்டப்பட்டன.

மேலும் ஐந்து பெரிய தவறுகள் இருந்தன - உதாரணமாக, மொத்த எண்ணிக்கை சரியாக இல்லை, சதவீதங்கள் தவறாக கணக்கிடப்பட்டன, உள்ளூர் சுகாதார அமைப்புகளுக்கு இவை நடந்ததாகவே தெரியாது.

இந்த குறைபாடுள்ள சோதனைகளில், 14 ஆய்வாளர்கள் தரவை திருப்பி அனுப்பத் தவறிவிட்டனர். சுயாதீன விஞ்ஞானிகள் இது மோசடியின் சாத்தியத்தைக் குறிப்பதாகக் கருத்து வெளியிட்டுள்ளனர்.

சுயாதீன குழுவால் பரிசீலனை செய்யப்பட்ட ஆய்வுக் கட்டுரைகளின் மாதிரியானது உலகம் முழுவதிலுமிருந்து சில உயர்தர ஆய்வுகளைக் கொண்டுள்ளது. ஆனால் முக்கிய பிரச்சனைகள் அனைத்தும் ஐவர்மெக்டினை பரிந்துரைக்கும் ஆய்வுகளில் இருந்தன - உண்மையில், எந்த அளவுக்குத் தொற்று நோய் தடுக்கப்பட்டதாகவும் உயிர்கள் காப்பாற்றப்பட்டதாகவும் கூற்று இடம் பெற்றதோ அந்த அளவுக்கு முறைகேடுகளுக்கு இடமிருந்ததாக ஆய்வுக் குழு கண்டறிந்தது.

பரிசோதனைகளில் மனித பிழை நேர்வது சகஜம் தான் என்றாலும், , அவற்றில் பல தெரிந்தே ஏற்படுத்தப்பட்டிருக்கலாம் என்று சிட்னியில் உள்ள நியூ சவுத் வேல்ஸ் பல்கலைக்கழகத்தின் மருத்துவர் மற்றும் ஆராய்ச்சியாளர் டாக்டர் ஷெல்ட்ரிக் நம்புகிறார்.

லெபனானில் சமீபத்தில் நடத்தப்பட்ட ஒரு ஆய்வில் 11 நோயாளிகளின் விவரங்கள் மீண்டும் மீண்டும் நகலெடுக்கப்பட்டு ஒட்டப்பட்டிருப்பது கண்டுபிடிக்கப்பட்டது - பரிசோதனையில் குறிப்பிடப்பட்ட நோயாளிகள் பலர் உண்மையில் இல்லை என்று தெரிகிறது.

ஆய்வின் ஆசிரியர்கள் பிபிசியிடம் "அசல் தரவு தொகுப்பு மோசடி செய்யப்பட்டது, நாசப்படுத்தப்பட்டது அல்லது இறுதி கோப்பில் தவறாக உள்ளிடப்பட்டது" என்றும் அதை வெளியிட்ட அறிவியல் இதழ் அதைத் திரும்பப் பெற்றதையும் குறிப்பிட்டுள்ளனர்.

இரானில் செய்யப்பட்ட மற்றொரு ஆய்வு, ஐவர்மெக்டின் மக்கள் கோவிட் நோயால் இறப்பதைத் தடுத்ததாகக் கூறியது. ஆனால் அதை ஆராய்ந்த விஞ்ஞானிகள் அதில் சிக்கல்களைக் கண்டறிந்தனர். நோயாளிகளின் இரத்தத்தில் எவ்வளவு இரும்பு உள்ளது என்ற பதிவுகளில் இயற்கையாக வர வாய்ப்பில்லாத ஒரு அளவில் எண்கள் இருந்தன.

மருந்துப்போலி கொடுக்கப்பட்ட நோயாளிகள், ஐவர்மெக்டின் தரப்பட்ட நோயாளிகளைக் காட்டிலும் சோதனை தொடங்குவதற்கு முன்பே இரத்தத்தில் குறைந்த அளவு ஆக்சிஜனைக் கொண்டிருந்தனர். அதனால் அவர்கள் ஏற்கனவே உடல்நிலை சரியில்லாமல் இருந்தனர் என்றும் புள்ளிவிவரப்படி இறக்க வாய்ப்பு அதிகம் உள்ளவர்கள் என்றும் கண்டறியப்பட்டது.

ஆனால் இந்த முறை பல்வேறு அளவீடுகளின் பரந்த அளவில் மீண்டும் மீண்டும் கையாளப்பட்டது. "மோசமான" அளவீடுகளைக் கொண்ட மக்கள் மருந்துப்போலி குழுவிலும், ஐவர்மெக்டின் குழுவில் "நல்ல" அளவீடுகளைக் கொண்டவர்களும் சேர்க்கப்பட்டார்கள்.

இரான் ஆய்வுக்கு தலைமை தாங்கிய டாக்டர் மோர்டெஸா நியே, முடிவுகள் மற்றும் வழிமுறைகளை ஆதரித்துப் பேசினார். சுட்டிக்காட்டப்பட்ட பிரச்சனைகளையும் மறுத்தார். பல்வேறு காரணிகள் பரிசீலிக்கப்படும் போது "இது போன்ற சீரற்ற தன்மையைக் காண்பது மிகவும் சாதாரணமானது" என்றும் பங்கேற்பாளர்களுக்கு கோவிட் ஏற்படுவதற்கான காரணிகளில் இவை தாக்கத்தை ஏற்படுத்தும் என்று கூறமுடியாது என்றும் அவர் தெரிவித்தார்.

இதுவரை வெளியிடப்பட்ட மிகப்பெரிய, தரமான ஐவர்மெக்டின் ஆய்வு கனடாவில் உள்ள மெக்மாஸ்டர் பல்கலைக்கழகத்தில் நடத்தப்பட்ட டுகெதர் ஆய்வு ஆகும். இதுவும் கோவிட் மீது எந்த நல்ல தாக்கத்தையும் இந்த மருந்து ஏற்படுத்தவில்லை என்று கூறுகிறது.

ஐவர்மெக்டின் பொதுவாக ஒரு பாதுகாப்பான மருந்தாகக் கருதப்படுகிறது, இருப்பினும் பக்க விளைவுகள் பற்றியும் சில அறிக்கைகள் பேசுகின்றன.

ஆனால் மக்களுக்கு தவறான பாதுகாப்பு உணர்வைக் கொடுப்பதன் மூலம் மறைமுகத் தீங்கு வரலாம், குறிப்பாக அவர்கள் கோவிட் மருத்துவமனையில் சிகிச்சை பெறுவதற்கோ தடுப்பூசி போட்டுக்கொள்வதற்கோ பதிலாக ஐவர்மெக்டினைத் தேர்ந்தெடுத்தால் சிக்கல் ஏற்படலாம்.

பெருவில் உள்ள பொது சுகாதார நிபுணர் டாக்டர் பாட்ரிசியா கார்சியா, ஒரு கட்டத்தில், மருத்துவமனையில் பார்க்கும் ஒவ்வொரு 15 நோயாளிகளில் 14 பேர் ஐவர்மெக்டின் எடுத்து வருவதாகவும், அவர்கள் வரும் போதே "உண்மையில் உடல்நிலை சரியில்லாமல்" இருந்ததாகவும் மதிப்பிட்டதாகக் கூறினார்.

ஐவர்மெக்டின் சார்பு ஃபேஸ்புக் குழுக்கள் அந்த மருந்தை எங்கு வாங்குவது என்பது குறித்த ஆலோசனைகளைப் பெறும் மன்றங்களாகவே மாறிவிட்டன. விலங்குகளுக்கான ஐவர்மெக்டின் தயாரிப்பாக இருந்தால்கூட அவர்கள் கவலைப்படுவதில்லை.

சில குழுக்கள் தொடர்ந்து ஐவர்மெக்டின் புறக்கணிப்பை சதி என்று கூறுவதுடன், தடுப்பூசி எதிர்ப்புக் கருத்துகளையும் வெளியிடுகின்றன. அந்த மருந்து கிடைக்கவில்லை என்றால் மருத்துவமனையை விட்டு வெளியேற ஊக்குவிக்கும் பதிவுகளும் இக்குழுக்களில் வெளியாகின்றன.

டெலிகிராம் செயலியில் இவர்களுக்கான வாய்ப்புகள் அதிகம் உள்ளன.

இந்த சேனல்கள் ஐவர்மெக்டின் பரிந்துரைக்கத் தவறும் மருத்துவர்களைத் துன்புறுத்துவதையும் விஞ்ஞானிகளைக் குறித்து அவதூறு கூறுவதையும் இலக்காகக் கொண்டு செயல்படுகின்றன. லிவர்பூல் பல்கலைக்கழகத்தைச் சேர்ந்த பேராசிரியர் ஆண்ட்ரூ ஹில், ஐவர்மெக்டின் குறித்த நேர்மறையான விமர்சனத்தை முதலில் முன்வைத்தார். பிறகு ஆய்வு முடிவுகளைப் பார்த்துப் பின் வாங்கினார். அதனால் அவர் விமர்சனத்துக்கும் உள்ளானார்.

குறைந்த எண்ணிக்கையிலான தகுதிவாய்ந்த மருத்துவர்கள் ஐவர்மெக்டின் குறித்த நற்சான்றிதழ் வழங்குவதிலிருந்து பின்வாங்கவில்லை. சோதனைகள் குறித்த முக்கிய கேள்விகள் எழுப்பப்பட்ட நிலையிலும், பிரபல ஆதரவாளர் டாக்டர் பியர் கோரியின் கருத்துகள் மாறவில்லை. அவர் "வெளி வரும் சோதனை தரவுகளின் மேலோட்டமான விளக்கங்களை" விமர்சித்தார்.

டாக்டர் டெஸ் லாரி பிரிட்டிஷ் ஐவர்மெக்டின் பரிந்துரை மேம்பாட்டுக் குழுவை நிறுவினார்.

அவர் கோவிட் -19 தடுப்பூசித் திட்டத்தை இடைநிறுத்த அழைப்பு விடுத்துள்ளார். கோவிட் தடுப்பூசி பாதுகாப்பு தரவுகளை தவறாக மதிப்பிட்டதால் அதிக எண்ணிக்கையிலான இறப்புகள் ஏற்பட்டதாக ஆதாரமற்ற கூற்றுகளையும் அவர் கூறினார்.

ஒரு ஆன்லைன் விவாதத்தின் போது ஐவர்மெக்டின் வேலை செய்யவில்லை என்பதை எந்த ஆதாரம் கொடுத்தால் ஒப்புக்கொள்வார் என்று அவரிடம் கேட்கப்பட்டதற்கு, ஐவர்மெக்டின் வேலை செய்கிறது. எதுவும் என்னை மாற்றமுடியாது என்று அவர் பதிலளித்தார். அவர் பிபிசியிடம், "இதைக் குறைத்து மதிப்பிடுவதற்கான தொடர் முயற்சிகள்தான் சிக்கலுக்குக் காரணம்" என்று கூறினார்.

உலகெங்கிலும் முதலில் தடுப்பூசிகளுக்கு எதிர்ப்பு இல்லை. ஆனால் அவற்றின் பற்றாக்குறையே மக்களை ஐவர்மெக்டினை நோக்கி இட்டுச் சென்றது.

இந்தியா, தென்னாப்பிரிக்கா, பெரு மற்றும் லத்தீன் அமெரிக்காவின் பெரும்பாலான பகுதிகளிலும், ஸ்லோவாக்கியாவிலும் இந்த மருந்து பல்வேறு இடங்களில் அங்கீகரிக்கப்பட்டது, பரிந்துரைக்கப்பட்டது.

பெரு மற்றும் இந்தியாவில் உள்ள சுகாதார அதிகாரிகள் சிகிச்சை வழிகாட்டுதல்களில் ஐவர்மெக்டினைப் பரிந்துரைப்பதை நிறுத்திவிட்டனர்.

பிப்ரவரியில், மருந்து தயாரிக்கும் நிறுவனங்களில் ஒன்றான மெர்க், இந்த மருந்தில் "கோவிட் -19 க்கு எதிரான சாத்தியமான சிகிச்சை விளைவுகள் இருப்பதற்கான அறிவியல் அடிப்படை இல்லை" என்று கூறியது.

தென்னாப்பிரிக்காவில், இந்த மருந்து பெரும் சர்ச்சையை ஏற்படுத்தியுள்ளது. மருத்துவர்கள் ஆதாரங்கள் இல்லாததை சுட்டிக்காட்டினாலும், பல நோயாளிகள் தடுப்பூசி கிடைப்பது சிக்கலானதாக இருந்ததால் இந்த மருந்தை நாட விரும்புகின்றனர்.

பதிவு செய்யப்பட்ட செவிலியரான தனது உறவினர் ஒருவர், கொரோனா தடுப்பூசிக்குப் பதிவு செய்யவில்லை என்றும் பின்னர் அவருக்கு கோவிட் தொற்று ஏற்பட்டது என்றும் கூறுகிறார் தென்னாப்பிரிக்கர் ஒருவர்.

"உடல் நிலை மோசமடையத் தொடங்கியபோது, சரியான சிகிச்சையைப் பெறுவதற்குப் பதிலாக, அவர் ஐவர்மெக்டின் உட்கொள்ளத் தொடங்கினார். வீட்டில் ஆக்ஸிஜனைப் பெற்றுப் பொருத்திக் கொண்டார். ஆக்சிஜன் அளவு (66%) குறைவாக இருந்தது என்று நான் கேள்விப்பட்டபோது, மருத்துவமனைக்கு அவரை அழைத்துச் செல்லும்படி அவருடைய மகளை நான் கெஞ்சினேன். முதலில் அவர்கள் தயங்கினார்கள், ஆனால் நான் அவர்களை போகச் சொன்னேன். சில மணிநேரங்களுக்குப் பிறகு அவர் இறந்துவிட்டார்." என்றார் அவர்.

கூடுதல் செய்தி : ஷ்ருதி மேனன்

source: bbc.com

Post a Comment

0 Comments